KALIBO, AKLAN— Uman nga ginpadumdum it provincial health office ukon PHO-aklan ro publiko kontra sa mga sakit nga pwedeng maangkon makaron nga tiempo it tag-init.
Raya hay kasunod man it pormal nga pag-anunsyo it pag-asa sa pagsueod eon it summer season.
Suno kay Dr. Cornelio Cuatchon, provincial health officer nga pila sa mga sakit nga dapat nga bantayan it publiko makaron nga summer season hay ro makamaeatay nga heatstroke, mga sakit kapareho it bungang-araw , sunburn, skin cancer, sore eyes, high blood, diarrhea, bulutong tubig ag iba pa.
Nagpaguwa man suno kana ro department of health it mga summer health tips nga pwedeng makabulig sa publiko agud nga makalikaw sa mga nasambit nga sakit.
Suno kay dr cuatchon nga agud nga makalikaw sa heatstroke, eabi eon ro mga nagapatigayon it visita iglesia makaron nga semana santa hay pirmeng mag-inom it tubi ag indi magbun-ag sa grabeng init it adlaw umpisa alas-10 it agahon hasta alas-3 it hapon.
Indi suno kana pagkalipatan ro pag-inom it maintenance nga bueong.
Samtang, ginpahayag dugang nga madali man nga magkasakit sa panit ro publiko sa tiempo it tag-init bangud nga pirmeng ginahueasan.
Makabulig sigon ro pagpaligos it daywang beses sa sang adlaw agud nga mapahagan-hagan ro grabeng kadanggga.
Samtang, agud nga makalikaw sa diarrhea, dapat nga ipabilin nga malimpyo ro alima antes nga magkaon ag indi mag-eaha it mga pagkaon nga madali nga magban-os.
