KALIBO, Aklan—Naghimo it madasigan nga aksyon ro lokal nga gobyerno it New Washington agud nga matapna ro pagkalhit it langis kasunod it pagleak it lube oil sa ginabreak nga power barge sa yard it Metallica Shipbuilding/Breaking Company sa Brgy. Polo sa nasambit nga banwa.
Kapin sa 15 nga personnel maghalin sa Philippine Coast Guard, 115 ka mga workers ag volunteers ro gindeployed sa lugar agud nga magtrabaho nga ma-contained ro pagkalhit it langis sa mga kasubaan sa nasambit nga lugar.
Angot kara, may limang ka segment it oil spill boom ro ginbutang maghalin sa Coast Guard Station sa Boracay ag base sa monitoring hay uwa it senyales it oil spill nga nakit-an sa Sitio Tugbungan ag Sitio Kuntang sa Brgy. Ochando kamana man sa Sitio Kamingawan sa Brgy. Poblacion.
Sa makaron hay nagapadayon ro clean-up operation it Philippine Coast Guard Station Aklan; Marine Environmental Protection Command (MEPCOM) it Philippine Coastguard ag iba pang Local Response Teams ag volunteers.
Nauna eon nga nagbueoligan ro mga raya sa pagbutang it Spill Boom, Manual Scooping & Matting with Marine Oil Absorbent Mats and Pads.
Mag-eowas kara, nagapadayon man ro ginahimo nga monitoring it lokal nga gobyerno sa sitwasyon agud nga inde eon madugangan pa ro halit nga gintuga it oil spill.
Madumduman nga pilang ka fish cage sa lugar ro naapektuhan kon sa siin nakit-an ro mga isda nga nagkaeamatay bangud sa epekto it langis.
