KALIBO, Aklan—Sang adlaw antes mag-Bag-ong Dag-on, pila sa mga in-demand nga prutas hay nagaka-ubusan eon.
Suno kay alyas Lilet, sangka fruit vendor sa kahabaon it Roxas Avenue, Kalibo nga pila sa mga raya hay ro peras ag kiwi.
Owa eon suno kana it maga-abot sanda nga stock rason nga posibleng owa eon kara it mabakae sa bisperas it selebrasyo.
Samtang, maskin nga nagapabilin ro presyo it maabu nga mga bilog nga prutas apang may iba man nga nagmahae bangud sa sangkiri nga supply.
Pila sa mga maabung stock ro ponkan, mansanas, suwa , kiat-kiat, grapes ag iba pa.
Nakasanayan eon it maabung mga Pinoy ro pagbakae ag paghanda it mga bilog nga prutas sa pagsig-aeaw sa Bag-ong Dag-on bangud sa pagpati nga suwerte ro mga raya.
Pila sa mga mabakae nga prutas hay ro : fuji apple nga mabahoe — 3 for 100 pesos.
Makarondaya man sigon ro presyo it peras ag orange.
Nagapabilin sa 10 pesos ro mansanas nga maisot ag ponkan.
Ro persimmon hay mabakae sa 50 pesos kada sambilog; ro grapes nga may bosoe hay 150 pesos ro kilo ag ro seedless hay 250 pesos.
Samtang ro black grapes hay 400 pesos per kilo.
80 hasta 100 pesos ro sangka pack it kiat-kiat.
Longgan hay 250 pesos ; pinya hay naga-average sa 40 hasta 70 pesos ag ro singkamas hay 90 pesos ro per kilo.
120 pesos per kilo man ro bayawas ag ro dalandan hay 60 pesos ro kilo.
Tig-20 pesos ro lemon ro tanan sigon nanda nga prutas hay pwedeng makabakae it tingi depende sa budget.
Laygay pa kara nga agud nga makakumpleto it 13 nga prutas nga koleksyon , pili-on ro barato ag makaon.
