KALIBO, Aklan–Pila sa mga nabiktima it gina-alegar nga scammer nga si Joshua Esmeralda, residente it barangay Estancia, Kalibo ro nagdangop sa Bombo Radyo Kalibo agud nga ireklamo ro ginhimo nga pagpangloko kanda.
Nasayuran nga pila sa mga naging biktima hay Overseas Filipino Workers ukon OFWs samtang ro iba hay taga-Metro Manila.
Ginasugid nga kakunchaba kon amat ni Joshua sa anang transaksyon ro misis kara nga si Jenifer Zonio.
Sa kaabuon it mga nagareklamo, nagbilog eon ro mga biktima it group chat.
Sa panaysayon it pila sa biktima, nagapakuno-kuno nga online seller it mga beauty products ro mag-asawa, kun sa siin madali sanda nga napapati nga legit ro andang transaksyon rason nga maeumo para kanda ro magtau it down payment nga ro pinakamataas hay naga abot sa masobra sa 30,000 pesos.
Ginapadaea sigon nanda ro bayad pinaagi sa online banking ukon money transfer application kapareho it Gcash.
Nagpati sigon ro mga customer nga “on the way” eon ro andang order rason nga nagpadaea it bayad , apang owa it produkto nga nadeliver ag puro “alibi” ag tug-an eamang.
Samtang, ginpahayag man ni Liezel Enriquez nga nabiktima imaw ni Joshua pinaagi sa online game nga Axi Infinity.
Sa makaron sigon hay ginapaeag pa sanda nga pagakasuhan it cyber liber bangud sa gina alegar nga pagpanamad kanda.
