KALIBO, Aklan—Ro goiter hay ro pagbahoe it thyroid gland it sangka tawo.
Tanan nga tawo hay may unang thyroid gland ag kaabuan kara hay maisot eamang.
Suno kay Dr. Queenie Ngalob Samonte, sangka Internist-Endocrinologist nga ro thyroid gland hay sangka endocrine gland nga naga-ubra it mga hormones nga importante sa metabolismo ag tamang pagbahoe it kaeawasan.
Ro normal levels it thyroid hormones hay importante agud makaangkon it tamang pagpitik it tagipusuon, pagbahoe ag paghueag it muscles, regulasyon it temperatura it kaeawasan, ag para sa mga babaye hay ro tamang regulasyon it menstrual cycle.
Ro thyroid gland hay makit-an sa tunga sa may idaeum nga bahin it liog.
Masami nga indi raya makapa, apang kung may unang goiter ro sangka tawo, puwedi rayang makit-an ukon makapa bilang isaeang ka bukoe sa liog.
Ro pila sa mga sintomas kara hay ro mga masunod; madasig ukon iregular nga pagpitik it tagipusuon; perming pagkabalisa; nakabatyag it sobrang kainit sa kaeawasan; pagniwang apisar nga nagakaon it tama; masami ukon nagabaskog nga regla; ag perming pagkabatyag it gaoy ukon maeuya.
Nasayuran nga ro doktor nga naga check sa mga tawong may goiter hay ro ENT (Ear Nose Throat) Surgeon ag ro Endocrinologist.
Ro Endocrinologist ro nagatao it mga bueong agud panabaon ukon pataason ro thyroid hormones sa mga tawong may hyper ukon hypothyroidism.
Kung naging normal ro thyroid hormone levels hay puwedi eun nga ipatan-aw sa ENT Surgeon agud nga kakason ro thyroid gland para indi eun mag uman pa ro abnormal nga pagtaas ukon pagnaba it thyroid hormones.
Kung may nagatubong bukoe sa thyroid gland, ro ENT Surgeon ro nagahimo it operasiyon agud nga kakason raya.
Samtang makabulig man ro Endocrinologist ag ENT Surgeon sa pag-alaga ag pagbueong it mga tawong may goiter.
