KALIBO, Aklan — Uman nga makaangkon it international flight operations paadto ag paguwa it Kalibo International Airport ro pilang mga airline companies sa pagbukas it Boracay sa Oktubre 26 matapos ginpaidaeom sa an-om nga bueang rehabilitasyon.
Sa interview it Bombo Radyo, ginpahayag ni Civil Aviation Authority of the Philippines (CAAP)-Aklan manager Eusebio Monserate, Jr., maabo eon nga airlines ro nagsumiter it andang proposal para sa andang mga slots sa pagbalik it andang biyahe kapin eon ro mga international flight halin it China ag South Korea.
Ginpahayag pa kara nga sa makaron pa eamang hay nadugangan eon ro mga domestic flights.
Ro pagbawas it commercial flights sa paeoparan halin kara ginpasarado ro Boracay hay nagtuga it pakabudlay sa mga pasahero ag cargo traffic.
Samtang, ginkumpirma man ni Monserate nga ginpabalik eon umpisa kahapon ro mga empleyado it CAAP nga temporaryong ginsaylo sa Roxas ag Iloilo Airport nga naapektuhan it Boracay closure.
