Nag-augment ro pilang tawuhan it Aklan Provincial Disaster Risk Reduction Management Office partikular sa banwa it Altavas agud nga i-rescue ro pilang ka mga residente nga naga-istar sa low lying areas sa nasambit nga banwa nga na-trap sa naeksperyensyahang madaeom nga pagbaha.
Suno kay Gary Taytayon, operations and warning section chief officer it PDRRMO Aklan nga pilang ka banwa sa probinsya it Aklan ro nagmatsa suba ro national highway ag matsa eawod ro mga kaeanasan bangud sa tuman kataas nga tubi-baha partikular sa banwa it Altavas, Balete, Batan ag Numancia.
Ro mga nasambit nga lugar hay inde maagyan it tanan nga klase it saeakyan pag-abot it bandang alas-3:00 it hapon apang makataliwan ro pilang oras hay gilayon man nga naghubas ro tubi kasunod sa paghueaw it uean.
Nakalista it landslide sa nabukid nga porsyon it Balete, Batan, Altavas ag Banga kamana man pagkagiltak it sangkiri nga porsyon it national highway sa banwa it Balete.
Sa makaron hay padayon pa ro monitoring it Aklan Provincial Disaster Risk Reduction Management Council sa mga low lying areas ag gin-abisuhan ro mga nagaistar sa manabang lugar nga inde eon paghueaton ro hapon ukon gabie agud magbakwit sa mga evacuation centers kon maeksperyensyahan ro sigidas nga pagbuhos it mabaskog nga uean bangud sa ginaeauman nga bahaon it uman ro mga low lying areas daea eon man it pag-awas it tubi-baha maghalin sa suba, sapa ag irigasyon.
Samtang sa pihak nga parte, nagdeklara it class suspension makaron nga adlaw it Lunes ro lokal nga gobyerno it Batan, Altavas, Balete, Banga, New Washington, Numancia ag Tangalan.
