KALIBO, Aklan–Sa ikaywang sunud-sunod nga dag-on bangud sa covid 19 pandemic, kanselado eon man ro pilang mga mabahoe nga aktibidad nga nakasanayan kada ati-atihan festival sa maabot nga enero 2022.
Suno kay Kalibo Mayor Emeson Lachica nga indi anay sanda magapatigayon it tradisyunal nga sadsad agud nga makalikawan ro pagtaeapnan it deadly virus eabi pa ag nakasueod eon suno kana sa nasyon ro omicron variant.
Indi sigon malikawan nga dumugon it maabu nga mga tawo ro event eabi eon ro mga deboto ni Señor Sto. Niño de Kalibo.
Apang ginpasiguro it Ati-Atihan organizers nga makaangkon gihapon sanda it mga aktibidad agud nga mabatyagan ro espiritu it festival nga nakataeana sa Enero 10 hasta 16, 2022.
Raya hay pagaeakipan it Inter-Barangay Mosaic contest, Bendisyon photo contest, Color My Ati 2022, Pinta Ati ukon Ati-Atihan themed painting contest, Suksok ni Sto. Niño costume design contest ag Miss Kalibo Ati-Atihan beauty pageant.
Nasayuran nga haeos tanan nga mga banwa nga may kaugalingon nga bersyon it Ati-Atihan festivals kapareho it banwa it Ibajay, Makato, Batan, Lezo, Malinao, Kalibo ag isla it Boracay hay owa anay nagpatigayon it selebrasyon makaron nga dag-on.
Sa pihak nga parte, may pagahiwaton sa gihapon nga mga novena prayers ag adlaw adlaw nga misa sa Saint John the Baptist Cathedral agud nga dumdumon ro debosyon kay Señor Sto. Niño de Kalibo.
