KALIBO, Aklan — Nagakabaeaka sa makaron ro pilang mga electronic ukon e-trike drivers and operators nga maapektuhan ro andang kita sa pagsueod it mga bag-ong kompaniya nga magamanehar it e-jeepney sa isla it Boracay.
Sa interview it Bombo Radyo, ginpahayag ni Jay-Ar Salvador, sangka e-trike driver nga mahimo sigon nga mabawasan ro andang kita kapin eon sa gina-offer nga libreng sakay umpisa sa Oktubre 26 sa uman nga pagbukas it isla hasta sa Disyembre 2018.
Ginpamalibaran man kara nga kueang ro numero it andang saeakyan.
Nauna eon kara nga ginpahayag ni Transportation Secretary Arthur Tugade nga ro mga pasahero sa isla it Boracay hay magagamit eon it card ukon wristband agud magbayad it pamasahe.
Raya hay sa idaeom it integrated fare collection system nga kaparehas it Beep nga ginagamit para sa Metro Manila Railways.
Ro pamasahe hay P300 kada tawo nga magabuhay it tatlong adlaw para sa unlimited nga sakay, apang libre ro mga menor de edad, senior citizens ag persons with disabilities.
Ro saeakyan hay solar powered nga may wi-fi, closed-circuit television camera (CCTV) ag global positioning system (GPS).
Mag-eowas sa paggamit it modern jeepney, magagamit man it e-trikes sa Boracay reopening agud mapabilin ro kalimpyuhan ag kaanyag it isla.
