KALIBO, AKlan—Nagkansela eon it klase ro Regional Science High School for Region VI angot sa pagkabaeaka sa pagkalhit it makamaeatay nga respiratory virus.
Raya hay kasunod it pag-quarantine sa 11 nga Chinese tourists sa Governor Corazon Legaspi-Cabagnot Memorial Training Center sa Brgy. Old Buswang, Kalibo bangud sa posibilidad nga exposure it mga raya sa novel coronavirus.
Suno kay Phoebe Renado, librarian ag tagapaghambae it nasambit nga eskwelahan nga maskin nga owa pa sigon it kumpirmadong kaso it novel corona virus sa Aklan hay ginpakamayad it andang eskwelahan nga indi anay pagpasudlon ro andang mga estudyante.
Nagpanawagan man imaw sa mga natungdan nga kon may suspension it klase hay ipaguwa raya it temprano.
Raya hay kasunod it pag-aeabutan pa it andang mga estudyante, Huwebes it agahon sa pihak nga may ginpaguwa eon nga executive order si Kalibo Mayor Emerson Lachica angot sa suspension it klase sa mga eskwelahan nga maeapit sa Training Center.
Ro pagsuspinde hay naka “indefinite” nga nagakahueugan nga iga-anunsyo ro uman nga pagbalik it mga estudyante sa oras nga makahalin eon ro mga gin-quarantine nga Chinese.
Bilang proteksyon hay nagasuksok sanda it face mask nga ginpanupod kanda.
Indi man sigon nanda ma-kwestiyon ro mga otoridad kon ham-an nga gintaeana nga quarantine area ro nasambit nga hotel nga makabig nga residential area ag maabu pang eskwelahan nga nakapalibot.
