KALIBO, Aklan—Umpisa ko adlaw it Lunes, Abril 1, naga-abot eon sa 840 nga mga pampublikong eskwelahan sa bilog nga Western Visayas ro temporaryong nagsuspinde it in-person classes ag nagsaylo sa alternative delivery mode kapareho it modular distance learning bangud sa mainit nga paniempo tuga it El Niño phenomenon.
Raya ro ginkumpirma ni Mr. Hernani Escullar Jr., Department of Education ukon DepEd Region 6 spokesperson sa Bombo Radyo.
Sa nasambit nga numero, kabilugan nga 494,681 nga mga learners ro temporaryo nga nag-shift sa alternative delivery mode.
Ro nasambit nga mga eskwelahan hay naghalin sa 10 nga schools division offices kun sa siin owa naeakip kara ro mga eskwelahan halin sa Aklan.
Ginasugid nga ro pagsuspinde it klase hay may mandu halin sa natungdan nga local government units mag-eowas sa schools division of Guimaras kun sa siin ro pagsuspinde it klase it 96 nga mga eskwelahan hay naghalin sa andang school heads.
Kahapon nga adlaw it Martes, ro schools division of Guimaras pa eamang ro nagdeklara it pagbalik it in-person classes.\
Nauna eon nga ginpahayag it DepEd nga may mga eskwelahan sa nasyon nga nagpatuman it ibang pamaagi it pagturo agud nga indi masyadong maapektuhan ro pagtuon it mga estudyante sa sitwasyon it paniempo.
Gintaw-an man kara it gahum ro mga school heads nga magsuspinde it klase.
Pila sa mga eskwelahan ag lugar nga suspindido ro face-to-face class hay ro Iloilo City , Bacolod City, Roxas City, Kabankalan City, Silay City, Guimaras , Himamaylan City,Bago City, Iloilo ag Negros Occidental.
Nauna eon nga ginpahayag it state weather bureau nga ginaeauman nga magabuhay ro El Niño hasta March-April-May 2024, nga may 74% nga tiyansang magsaylo sa El Niño–Southern Oscillation neutral conditions sa April-May-June 2024.
