KALIBO, Aklan–Matapos ro haeos magkasunod nga pag-atake it mga miyembro it salisi sa sueod it pilang establisyemento komersyal sa banwa it Kalibo, hugut makaron ro pagpaandam it mga business owner sa publiko agud nga indi mabiktima it mga kawatan.
Suno kay Irene Mariano, Store Manager it FU’s Merchandising nga presente nanda nga ginatun-an ro mga pagahimuon nga tikang para indi mauman ro insidente ag madasig nga matumod ro pagkatawo it mga miyembro it salisi.
Sambilog sigon sa posibleng ipatuman nanda hay ro uman nga pagbalik it dating patakaran sa pagsueod sa andang establisyemento nga kinahang-ean anay paeson it makadali ro face mask sa entrance.
Apang, magahueat anay sigon sanda it “go signal” halin sa mga otoridad antes raya ipatuman.
Tuyo kara nga mapadali ro pagtumod sa identity ukon itsura it mga suspek engkaso nga may magpang biktima sa sueod it establisyemento.
Madumduman nga pilang ka mga bumaeakae ro nagreklamo matapos nga matakawan it cellphone, alahas, kwarta ag iba pa samtang nagapamakae.
Base sa buoe it CCTV footage, makit-an ro estilo it tatlong ka mga persona nga nagalibot sa mga biktima.
Hasta sa makaron hay nagapabilin nga blangko ro mga otoridad sa pagkatawo it mga suspek bangud indi maklaro ro andang itsura nga natabunan it suksok nga face mask.
