KALIBO, Aklan — Temprano nga nag-umpisa sa pagboto ro mga pumueuyu sa pilang estado it Amerika para sa US Election 2024.
Raya hay sa pihak nga sa Nobyembre 5 pa nakataeana ro eleksyon sa pagkapangueo.
Suno kay Bombo International Correspondent Pinoy Gonzales it Texas, USA nga kaibahan sa mga raya hay ro ginakabig nga “battleground” kapareho it North Carolina ag Georgia.
Sa makaron suno kana hay nagapadayun ro pagpangampanya nanday Democratic Vice President Kamala Harris ag Republican candidate nga si dating Pangueong Donald Trump agud nga makabo-oe it suporta halin sa mga botanteng bukon pa it sigurado kon sin-o ro andang igaboto.
Ginpaathag kara nga bukon it popular votes ro nagadesisyon kun sin-o ro magadaog .
Sa baylo hay nagataeana it mga “electors” nga magarepresentar sa kada estado sa Electoral College, nga sanda ro magapili it pangueo.
Agud nga magdaog, kinahangean nga mabo-oe it kandidato ro 270 halin sa 538 electoral votes.
Ro mga boto sa Electoral College hay ginatunga depende sa populasyon it kada estado.
Sa pihak nga parte, gindugang pa ni Gonzales nga si Harris makaron ro nagapanguna sa mga national survey nga may 2.4-percentage-point nga abanse kay Trump.
Apang masyadong masandukot ro andang engkwentru .
Base pa sa survey nga si Harris hay may 54% nga tsansa nga magdaog kumpara sa 46% ni Trump.
Ro mga ginatawag nga swing states ukon battleground states hay posibleng maka apekto sa resulta it eleksyon.
Dugang pa ni Gonzales nga ro mga ginabantayan nga mga estado hay ro Arizona, Georgia, Michigan, Nevada, North Carolina, Pennsylvania, ag Wisconsin kun sa siin owa sanda it klaru nga gina-apinan nga partido.
Nagapakita sa mga survey nga masyadong dukot ro away nanday Trump ag Harris sa mga swing states.
Mas importante suno kana ro survey sa nasambit nga mga estado bangud nga ro Electoral College ag bukon it popular votes ro magadesisyon kun sin-o ro magiging pangueo.
