KALIBO, Aklan–Maswerteng naeuwas it Philippine Coast Guard ukon PCG-Aklan ro pilang indibidwal nga sakay it kumueob nga sangka motorbanca sa baybayon nga sakop it Brgy. Poblacion, Malay.
Ginpahayag ni Dominador Salvino, Deputy Commander for Operation it CGS-Aklan nga bandang alas-12:10 it hapon ko adlaw it Dominggo kat nakabaton sanda it tawag nga may nagkueob nga baroto kung siin insigida sanda nga nagresponde.
Pag-abot sa area naabutan pa nanda ro tatlong nabilin nga indibidwal nga nagapaeutaw-eutaw rason nga ginkabuligan nanda ro mga raya nga madaea sa bibi.
Nasayuran nga may daywang ka mga motorbanca nga naga-eayag halin sa bahin it Brgy. New Buswang, Kalibo kat naabutan sanda it mabaskog nga hangin ag baeod kung siin ro sambilog nga baroto hay nagkueob.
Magapaadto kunta sa Buruanga ro mga biktima para magbisita sa andang iba pang mga paryente.
Sa makaron, una eon sa euwas nga kahimtangan ro natungdan nga mga indibidwal.
