KALIBO, Aklan–Padayun nga nagapanawagan it bulig ro pilang indibidwal para maisaylo sa mas maayos nga pasilidad ro sangka eaeaki nga naga-isaeahanon nga naga-istar sa idaeom it Kalibo-Numancia Bridge ag ginapahayag nga may deperensya sa paminsaron.
Personal nga nasaksihan it Bombo News team ro makaeueu-oy nga sitwasyon it nasambit nga persona matapos ro pagbisita sa lugar.
Bangud nga owa sa tamang katinuan ro eaeaki, malisod para sa anang pamilya nga paulion imaw bagud masami raya nga nagapaeagyo kun andang paeapitan.
Maskin sigon nga gustuhon it anang pamilya nga maalagaan imaw ag malimpyuhan ro anang naghaeok nga nina sa alima hay mabudlay man raya para kanda.
Nauna eon nga nagpaabot it concern ro pilang driver it Numancia TODA angot sa kahimtangan it nasambit nga persona tuga it pagkabaeaka nga base makaangkon it impeksyon ro anang nina.
Nagaeaum man ro anang pamilya nga mabuligan sanda it mga natungdan para mataw-an imaw it nagakaigo nga pagbueong ag pag-depara.
