KALIBO, Aklan—Pilang ka mga international flights halin sa nagkaeain-eain nga nasyon ro nagbalik sa Kalibo International Airport matapos nga temporaryong napundo bangud sa nag-agi nga pandemya.
Raya ro naging pahayag ni Engr. John William Fuerte, general manager it Civil Aviation Authority of the Philippines (CAAP) Aklan kasunod it nataeopangdan nga pag-abo it mga pasahero nga nagaagi sa nasambit nga paeoparan maghalin sa nasyon it South Korea ag China kon sa siin naga-average it kapin sa 150-170 nga mga pasahero sa kada flight.
Paathag pa ni Engr. Fuerte nga uwa it anuman nga additional requirements mag-eowas sa e-travel kon sa siin makit-an man raya sa online ag anda eamang nga i-scan kon nakaabot eon sa KIA ro pasahero.
Samtang, nagapadayon man suno kana ro proyekto it Department of Transportation ukon DOTr sa nasambit nga paeuparan nga haeos una eon sa 70-80% ro natapos.
Malipayon man nana nga ginpakigbahin ro pagbalik it Juneyao Air, nga halin sa Shanghai, China paadto sa Kalibo vice versa nga nauna eon nga napundo bangud sa nagtaliwan nga pandemya.
Sa makaron suno kana hay nagahueat eon lang sanda it letter of intent halin sa mga nagkaeain-eain nga airlines nga gustong maghugpa sa KIA.
Sa pihak kara, ginpadumdom ni Engr. Fuerte ro tanan nga byahero it domestic flights nga dapat daywang oras antes ro schedule of flight hay idto eon sa paeoparan samtang sa international flights hay tatlong oras antes ro skedyul it pag-eopad it ginasakyan nga eroplano agud nga masabat pa ro andang mga pangutana.
Mag-eowas kara, may mga ginbutang man nga Malasakit Help Desk para sa pagbulig sa mga pasahero nga may mga concerns sa andang byahe.
