Positibo ro naging komento it alkalde it banwa it Ibajay, Tangalan ag Malay nga sentro sa hagna nga ginaduso ni Aklan second district representative Teodorico Haresco nga House Bill 7032 ukon ro pagtukod it West Aklan Special Economic Zone Authority ukon WASEZA sa probinsya it Aklan.
Sa ginpatigayon nga press conference, ginapanan-aw ni Tangalan mayor Gary Fuentes nga kon madayon raya nga hagna hay matutukan ro ekonomiya nga eubus nga makabenepisyo ro andang banwa.
Ginklaro man it alkalde nga paga-istoryahan nanda raya sa konseho antes nga makata-o it andang desisyon ag mga suhestyon.
Apang, positibo imaw nga ginhimo raya it kongresista para sa kamaeayran it nasambit nga mga banwa.
Sa pihak nga parte, ginpahayag mat-a ni Malay mayor Frolibar Bautista nga kon ro katuyuan hay sa pagpasanyog ag pagpabaskog it ekonomiya bukon eamang it sa andang banwa kaeakip ro isla it Boracay hay nagakadapat raya nga suportahan.
Apang, kinahang-ean man suno kana nga mabatian ro pulso it mga opisyales it natungdan nga banwa.
Nauna eon nga ginpahayag ni Haresco nga nagapati imaw nga mabahoe ro ikabulig it WASEZA sa pag attract it maabong investments ag makata-o it employment opportunity sa rehiyon nga makabulig sa pagpaumwad it ekonomiya it nasyon.
