Kalibo Aklan ——-Bangud sa grabeng pagbuhos it uean sa sueod it sang gabie, ginbaha ro pilang ka mga banwa sa probinsya it Aklan.
Base sa nabooe nga impormasyon it Bombo Radyo Kalibo, ginbaha it hasta sa tuhod ro mga banwa it Tangalan, Ibajay, Lezo ag Malinao kung sa siin ginsueod pa ro pilang ka mga panimaeay it tubig-baha.
May kaangtanan kara, nagakinahang-ean pa nga ibakwit ro kabaong sa sangka namatyan sa Barangay Poblacion, Tangalan bangud sa nagataas nga tubig-baha.
Pabugso-bugso man ro pagbuhos it uean sa bilog nga probinsya tuga it Low Pressure Area (LPA).
Samtang, nagapabilin nga nakabantay ro mga miyembro it Municipal Disaster Risk Reduction Management Office (MDRRMO) it mga nasambit nga banwa agud madasig ro pagpabakwit sa mga residente eabi eon sa mga low lying areas engkasong magtaas gihapon ro tubig-baha.
