KALIBO, Aklan—Pilang ka mga lugar sa probinsya it Aklan ro naka-eksperyensya it mga pagbaha ag pagkahugos it eugta kahapon.
Raya hay matapos ro pilang oras nga pagbubu it mabaskog nga uean tuga it ginabantayan nga Low Pressure Area (LPA).
Bangud kara, may pila ka mga motorista ro napaeungan it andang makina bangud sa mataas nga tubi-baha sa karsada.
Suno kay Mr. Dodong Rufin it MDRRMO-Banga nga grabeng pagbaha ro na-eksperyensyahan sa bahin it Brgy. Torralba ag Brgy. Venturanza.
Bagud sa masyadong mataas nga tubi-baha sa karsada hay owa eon ginpasugtan ro mga maisot nga saeakyan nga magtabok sa Brgy. Torralba.
Ro ginpasugtan eamang sigon nga makadiretso hay ro mga daeagkuan nga behikulo.
Sa pihak nga parte, sangka landslide man ro nailista sa bahin it Batan cemetery.
Mag-eowas kara, nakaangkon man it pila ka mga power interruption.
Todo alerto man ro tagsa-tagsa ka mga lokal nga gobyerno partikular ro kada Municipal Disaster Risk Reduction Management Office (MDRRMO) sa 17 ka mga munisipalidad it Aklan kamana man ro Provincial Disaster Risk Reduction Management Office (PDRRMO).
Partikular nga ginabantayan it mga natungdan nga taeatapan ro sitwasyon sa mga kasubaan eabi eon ro Aklan river.
