Nakaangkon it negatibong komento maghalin sa Gabriela Women’s Organization sa Western Visayas ro official visit ni Pangueong Ferdinand Marcos Jr. sa nasyon it Estados Unidos.
Raya hay matapos nga nahanamaan ro anang byahe sa pagdumdom it Labor Day.
Suno kay Lucy Francisco, raya ro unang Labor Day kunta nga kaibahan it mga mamumugon ro presidente it nasyon apang uwa sigon nakit-an ro anang presensya.
Ro panawagan suno kana it mga obrerong Pilipino hay makaangkon it umento sa presenteng minimum nga pasweldo bangud sa ginapangatubang nga sitwasyon makaron hay inde eon masarangan ro ginakita it nagatrabaho para makasagod it sangka pamilya.
Mag-eowas kara, maabong hangkat ro kinahang-ean nga atubadngon it administrasyon nga maging paborable sa mga ultimo nga tawo apang uwa nabatyagan ro anang presensya ag pag-ulikid sa mga raya.
Samtang sa pihak nga parte, panawagan ni Princess Fernandez, sangka miyembro it Kabataan Partylist sa gobyerno nga makaangkon it programa para kanda nga mga estudyante nga matustusan ro andang pag-eskwela.
Mag-eowas kara, gusto man nanda nga may sigurado eagi nga trabaho para kanda iya sa nasyon agud nga inde eon kinahang-ean nga magpaibang bansa pa ro mga raya para eamang makatrabaho ag makabulig sa andang mga ginikanan.
