KALIBO, Aklan—Plano ni Punong barangay Leovigildo Villanueva it Dumga, Makato nga ipaidaeum sa lockdown ro pilang baeay sa andang lugar matapos nga madugangan it limang residente ro nagpositibo sa COVID-19.
Suno kana nga ap-at sa mga nagpositibo sa deadly virus hay miyembro it pamilya it namatay nga 47 anyos nga Engineer it Aklan Electric Cooperative ukon Akelco nga nauna eon nga nagpositibo sa sakit ag ro sambilog hay sangka engineer nga anang ka-trabaho ag residente man it andang barangay.
Sa mayad nga swerte suno kana hay puro asymptomatic ro pasyente.
Maabu suno kana ro maapektuhan kon bilog nga sitio ro andang igapasarado.
Samtang, plano man ni kapitan Villanueva nga temporaryo man nga igapasarado ro andang barangay hall para sa disinfection.
Ginasugid nga inatake sa tagipusuon ro engineer ag gindeklarang dead on arrival sa provincial hospital ko Pebrero 24.
Ginboe-an sigon raya it swab sample ag nagpositibo sa covid 19 rason nga insigidang gin-cremate sa siyudad it Iloilo.
Comorbid suno kana ro pasyente ukon maabu eon nga ginabatyag nga sakit.
Angot kara, nag-apela si kapitan Villanueva sa anang mga kasimaryo nga magkooperar sa anuman nga igapaguwa nga mandu agud nga mapugngan ro mas pang pagkalhit it covid 19 sa andang lugar.
