KALIBO, Aklan—Bangud sa padayon nga paeag it covid -19 pandemic, haeos 15,000 nga katawo eamang ro ginpasugtan nga maka-agto sa Times Square sa New York sa pagsug-aeaw it bag-ong dag-on.
Suno kay Bombo International Correspondent Greg Aguilar, mag-eowas nga ginlimitahan ro numero it mga tawo nga maka-agto sa lugar para magsaksi sa pamosong New Year’s countdown hay kinahangean nga fully vaccinated ro mga raya.
Obligado man ro mga raya nga magsuksok it face mask sa tanan nga oras ag mag-obserba it physical distancing.
Makabig suno kana nga global tradition ro event nga ginakaeangkagan ag gina-abangan it bilog nga kalibutan eabi eon ro paghueog it sikat nga New Year’s Eve Ball halin sa ibabaw it One Times Square.
Ro nasambit nga kahiwatan hay gin-broadcast agud nga masaksihan it mga tawo sa telebisyon ag internet.
Ginpahayag ni aguilar nga kat owa pa it pandemya hay haeos 80,000 nga katawo ro nagatambong sa nasambit nga event.
Sa pihak nga parte, ginpahayag ni Aguilar nga mas mabahoe ro selebrasyon makaron it New Year’s Eve sa Las Vegas bangud sa pagbuhos it kapin sa 800,000 nga katawo para sa holiday week-end.
Bangud kara, ginsarado it gobyerno idtu ro andang Las Vegas boulevard ukon Las Vegas strip kun sa siin dikara nagatumpok ro mga tawo sa pag-abang sa bonggang fireworks display.
Ginkumpirma dugang ni Aguilar nga uman nga na-stressed makaron ro mga health care workers sa US bangud sa grabeng pagtaas it kaso it omicron variant idtu.
Apang ro mayad nga balita suno kana hay owa it masyadong nailistang namatay.
May mga restrictions sigon nga ginapatuman sa nagkaeain-eain nga estado sa US apang moderate eamang rason nga nagapadayun ro mga sporting events.
