KALIBO, Aklan—Dismayado eon ro pilang ka mga tricycle driver bangud sa sigidas nga pagtinaas it presyo it produktong petrolyo sa nasyon.
Raya hay kasunod it napabalita nga super bigtime oil price hike makaron nga adlaw it Martes.
Suno kay Garry Leyson, tricycle driver nga may biyaheng Kalibo-Makato vice versa nga grabeng kalisod eon ro andang ginapas-an bangud sa masyadong mataas nga presyo it gasolina.
Nagakabaeaka sigon sanda nga base owa eon sanda it mai-uli nga kwarta para sa andang natungdan nga pamilya kun indi gihapon magpundo ro pagsipa sa presyo it petrolyo.
Apisar nga ginapasugtan eon ro full seating capacity sa mga pampublikong saeakyan sa idaeom it Alert Level 1 status, nagapabilin man sigon nga maeanghay ro andang pagbiyahe bangud sa kawad-an it pasahero.
Ginapahayag nga naga-average eamang sanda it tatlo hasta ap-at nga round trip kada adlaw kung siin 200 hasta 300 pesos eamang ro andang ginakita sa maghapon nga pasada.
Ginasugid nga naga-abot sa ap-at hasta limang litro nga gasolina ro andang maubos sa sueod it sang adlaw nga pagbiyahe rason nga mabudlay gid kanda ro masyadong mataas nga presyo.
Base sa pagtantiya it pilang kompaniya it langis, posibleng magtaas ro presyo sa kada litro it diesel it P12.20 hasta P12.30 samtang P6.80 hasta P7.00 man sa kada litro it gasolina.
