KALIBO, Aklan–Agud nga mahagan-haganan ro epekto it sigidas nga pagtaas it presyo it petrolyo, nagahimo eon lang it pilang ka mga diskarte ro mga tricycle driver para makatipid sa paggamit it gasolina.
Suno kay Rosel Zubiaga nga ro masami nanda nga gina-ubra makaron hay ro pagpila sa mga matawong lugar ukon establisyemento kaysa maglibot.
Raya hay bangud nga naga-abot eon sigon sa P350 ro andang nagagastos sa gasolina sa sueod it sang adlaw nga pagbiyahe sa Poblacion, Kalibo.
Masyado eon suno kana nga mabug-at para kandang mga driver nga naga-boundary ro mataas nga presyo it kada litro it gasolina.
Sa pihak it sangkiri nga ginakita, padayun sigon sanda nga magabiyahe para mapun-an ro adlaw-adlaw nga kinahang-eanon it andang pamilya.
Si Zubiaga hay pitong dag-on eon nga naga-pasada it tricycle sa banwa it Kalibo.
