Pabor ro pilang ka mga nagabiyahe it tricycle sa ginaproponer nga makaangkon eon it pagnaba it pamasahe sa tanan nga pampublikong transportasyon sa banwa it Kalibo.
Apang, nagakadapat eamang sigon suno kay Benjie Francisco, treasurer it Linabuan Norte Tricycle Operators Drivers Association ukon LITODA ag nagabiyahe sa Kalibo-Linabuan Norte vice versa nga siguraduhon it mga natungdan nga magpatuman it mga bag-ong sueundanan para indi sanda malugi.
Ginpabutyag kara nga bangud sa mga kolurom ag ibang rota nga nagabiyahe sa sueod it andang sakop nga barangay hay ginakueang sanda it mga pasahero rason nga masaming nagatambay eon lang sanda sa andang paradahan.
Ginpahayag dugang nga tiempo eon man sigon nga ibalik ro dating ginapatuman nga re-routing para indi eon makasueod ag makapang-agaw ro mga nagabiyahe it kolurom ag mga ibang rota sa andang lugar.
Apela pa kara sa LGU-Kalibo nga imbitahon sanda sa plenaryo para mapabutyag man nanda ro andang mga concerns angot sa nasambit nga resolusyon.
Angot kara. Nauna eon nga ginproponer ni Kalibo Sangguninang Bayan Member kamana man Chairman it committee on trasportation nga si Matt Aaron Guzman nga daeayon eon nga nabaan ro presenteng pamasahe kasunod man it panawagan it mga pasahero.
Sa makaron, presenteng 25 pesos ro pamasahe maghalin sa banwa it Kalibo paagto it Linabuan Norte ag vice versa.
Engkaso nga maaprubahan ro nasambit nga resolusyon hay puwedi sigon suno kay Francisco nga makaangkon it limang piso nga pagbuhin sa pamasahe.
