KALIBO, Aklan—Uman nga ginbaha ro pilang kabanwahanan sa Aklan matapos ro na-eksperyensyahan nga mabaskog nga pagbubu it uean kahapon tuga it Low Pressure Area (LPA).
Partikular nga ginbaha ro pilang barangay sa Balete, Libacao ag New Washington samtang nakaangkon man it sangkiri nga pagtaas sa tubi sa Aklan river ukon Guadalupe Bridge nga sakop it banwang Madalag.
Mag-eowas sa mabaskog nga uean, na-eksperyensyahan man ro grabeng pagpanaeugdog ag pagpangilat kung siin nakalista pa it sambilog nga patay.
Madumduman nga namatay matapos tamaan it kilat ro biktimang si Gabriel Inan, 22-anyos, residente it Brgy. New Buswang Kalibo samtang nagapadungka it ginasakyan nga boroto.
Sa mayad nga swerte hay naka-eowas ro daywa karang kaibahan nga sanday Christian at Edwin Pinos.
