KALIBO, Aklan – Pilang mga mangunguma sa probinsya it aklan ro apektado it naeksperyensiyahan nga grabeng tag-init bangud sa kawad-an it tubi sa kaeanasan.
Suno kay Vilma Relente it Brgy. Jugas, New Washington nga masyadong manaba ro andang ani bangud sa pagkasamad it bunga it mga gintanum nga paeay bangud sa kakueangan it tubi.
kon dati suno kana hay naga-harvest sanda it 60 nga sako halin sa tunga sa ektarya nga eanas, apang makaron hay naga-abot eon lang raya sa 40 hasta 45 sako.
Naging manaba sigon ro andang target nga harvest production rason nga nagresulta raya sa pagkalugi.
Sa nasambit nga gin-ani nga paeay hay dikara pa suno kana ginabo-oe ro suhoe, mga gastos sa eanas, pagpa-thresher, arkila ag iba pa rason nga ro nabilin hay haeos pang-konsumo eon lang nanda.
Mag-eowas sa grabeng tag-init hay problema man nanda ro pag-atake it mga ueod ukon army worm.
Panawagan nana sa department of agriculture nga suportahan sanda maskin it binhi ag fertilizer.
Samtang, nagpaabot man imaw it pagpasaeamat sa gobyerno sa gintau nga ayuda bangud nga maskin paalin sigon hay nakabulig-bulig raya sa andang kalisod.
