KALIBO, Aklan–Nagapanawagan ro pilang mga asosasyon it senior citizens halin sa Daja Norte sa banwa it Banga matapos nga sa kabilugan nga 30 nga barangay hay 24 nga barangay pa eamang ro nataw-an it unconditional cash transfer ukon cash grant it Department of Social Welfare and Development ukon DSWD.
Suno sa tagreklamo nga si Antonio Narral, presidente it Daja Norte senior citizen association nga gusto eamang nanda nga masayuran kon may mabaton pa sanda ukon owa eon.
Nagdangop eon man sigon sanda sa MSWDO-Banga PSWDO-Aklan, apang ginlaygayan nga maghueat eon lang it impormasyon nga andang igapaguwa.
Gusto sigon nanda nga magtau it time frame ro nasambit nga ahensiya agud nga indi eon sanda magsalig kon owa man lang it ginapaabot.
Samtang, padayun nga gintinguhaan it bombo radyo kalibo nga makipag angot sa DSWD region 6, apang owa pa it sabat hasta makaron.
