KALIBO, Aklan–Nakataeana nga i-sumite it Office of the Provincial Agriculturist ro pilang ka mga report angot sa damaged assessment kasunod it pagpanaeasa it bagyong Agaton ko nagtaliwan nga dominggo.
Apisar nga owa it ginpasaka nga anumang storm warning signal sa probinsya it Aklan, nabatyagan man ro epekto it bagyo partikular ro pagbubu it mabaskog nga uean nga nagtuga it pagbaha sa pilang kabanwahanan.
Ginpahayag ni Assistant Provincial Agriculturist Salome David nga naga-abot sa haeos P1.8 million ro naging kahalitan sa sektor it agrikultura sa banwa it Altavas matapos nga madaeasa ro pananum nga mais ag cassava it mga mangunguma sa bukid.
Ginabuebanta nga kapin sa 17 hectares it kamaisan ro nahalitan samtang 6.15 hectares ro kaeapad it nasamad nga katangkehan bangud sa flashflood.
Mag-euwas kara, nasamad man ro 55 nga fishing gear nga ginagamit it mga mangingisda sa pagpanagat.
Base sa partial report nga nabaton it taeatapan, naga-abot sa 207 hectares it mga tinuean-on ro nahalitan halin sa banwa it Altavas, Ibajay, Kalibo ag New Washington.
Gin-engganyo man ni David ro iba pang banwa nga magsumite it andang damaged assessment report para mai-eakip sa igapasa sa Department of Agriculture (DA)-6.
Ginpasiguro pa kara nga haum ro buffer stocks it DA sa nagkaeain-eain nga commodity sa oras it kalamidad.
