KALIBO, Aklan—Nakabaton eon ro pilang mga hotel sa Isla it Boracay it bookings halin sa mga dumueuong nga turista.
Suno kay Malay Tourism Officer Felix delos Santos nga raya hay base sa kumpirmasyon kana it pilang mga tag-ana ag manager it accommodation establishments sa isla.
Ginahueat eon lang sigon nanda makaron ro abiso halin sa Kalibo International Airport kun makaangkon it direct flights halin sa mga nasyong Korea, China, Taiwan ag iba pa.
Madumduman nga umpisa, Pebrero 10, pagapasugtan eon nga makasueod sa Pilipinas ro mga fully vaccinated tourist halin sa mga non-visa countries nga indi eon kinahangean nga magpaidaeum sa quarantine
Kinahangean nga magpakita eamang it andang mga vaccination card ukon certificate nga gin-isyu abroad agud nga makasueod sa probinsiya kaibahan ro andang passport.
Ro mga partially ukon mga owa pa nabakunahan hay kinahangean nga magpakita it negative result it swab test sa sueod it 72 oras antes ro departure.
Sa pihak nga parte, gindugang pa ni delos santos nga dere-deretso ro pag-aeabutan makaron it mga domestic tourists halin sa national capital region ukon NCR ag kaiping nga mga probinsiya.
Raya hay kasunod it pagduea sa RT-PCR test requirements it probinsiya ag ginpapanaog sa alert level 2 ro NCR.
Umpisa Pebrero 1 hasta 8 hay naga-abot sa masobra sa 11,731 ro tourist arrivals.
