KALIBO, Aklan— Nagapabilin nga problemado ro pila ka mga maintok nga negosyo partikular ro mga salon maskin nga ginbutang eon sa modified general community quarantine ro bilog nga probinsya it Aklan.
Raya hay matapos nga nagpaguwa it guidelines ro Department of Trade and Industry sa mga barbershops ag salon nga nagbukas umpisa ko Hunyo 1 kon sa siin ginabawaean ro SPA, waxing service, manicure, pedicure, massage, threading ag iba pa.
Mismong bueog eamang ro ginapahanugutan sa mga salon kaparehas it barber shops.
Suno sa sangka salon owner nga si Asia Adriana Ybarra, kon makarundaya ro estado it andang pagnegosyo hay mas makapamayad eon lang sigon nga magsarado lang anay sanda it uman bangud nga kon bueog eamang ro pasugtan hay inde sigon raya makabawi sa andang ginagastos partikular ro pasweldo sa anang mga staffs.
Ko una sigon hay eubus ro andang kalipay matapos nga gipasugtan eon sandang mag-operate it uman provided nga magasunod ro mga raya sa health safety measures.
Apang, ko ulihi hay gulpi man nga binawi it DTI ag eubus man nanda nga ginkasubo.
Una kara, gin-engganyo it DTI ro mga tag-iya it establisyimento nga magpatuman it “appointment system” kasunod it kinahang-ean nga 50 porsyento eamang ro pwede nanda nga mapasueod eabi eon kon maisot malang ro espasyo it salon ag barber shop.
