KALIBO, Aklan — Nagplastar it mga kondisyon ro pilang mga vendors sa Kalibo Public Market antes nga magapasugot nga magsaylo sa gintaeana kanda nga relocation site sa Eastern side terminal sa San Lorenzo drive, Brgy. Andagao, Kalibo.
Raya hay sa atubang it gintaeana nga deadline it Municipal Economic Enterprise Development Office (MEEDO)-Kalibo nga Setyembre 8 it makaron nga dag-on agud nga bakantehon nanda ro tindahan.
Suno kay Rosalia Tampos, presidente it Fish Vendors Association nga magasaylo eamang sanda sa oras nga mabaton ro memorandum of agreement halin sa andang makasugtanan sa local government unit (LGU)-Kalibo angot sa andang mga ginahinyu.
Apang gintugyan eon sigon ni Kalibo Mayor Juris Sucro sa MEEDO ro pagresolba sa mga ginahinyu it mga stall owners.
Kaeakip sa andang demand hay ro pag-angkon it fix nga baeayran sa andang pagbalik sa oras nga matapos eon ro construction kamana man ro sukat it andang mga bag-ong stalls ag pagpasugot sa mga delingkwente nga mga stall owners nga mataw-an it pwesto sa oras nga makompleto ro mga requirements nga ginapangayo kanda .
Sa pihak nga parte, apela pa ni Tampos nga ayuson ro andang relocation site nga maging komportable ro parehong mga vendors ag bumaeakae.
Ginareklamo nanda ro maisot ag manaba nga kisame it stalls ag ro kawad-an it drainage.
Nauna eon nga ginpaabot it MEEDO nga sa oras nga mabakante it mga stall owners ro tindahan sa Setyembre 8 hay pagabutangan raya it kordon , sangka patimaan nga maga-umpisa eon ro construction work para sa modernization it tindahan.
