KALIBO, Aklan — Pilang mga motorista ro natiketan sa ginpatigayon nga checkpoint operation it Land Transportation Office (LTO)-Aklan kabulig ro mga katapo it Kalibo Auxilliary Police sa parte it D. Maagma Sr. St, Kalibo, agahon it Martes, Hunyo 17.
Ro operasyon hay ginpangunahan ni Engr. Marlon Velez, hepe it LTO-Aklan.
Raya suno kana hay kaparte it andang padayun nga kampanya para sa kaeowasan sa karsada, pagpatuman it batas trapiko, ag mapabilin ro kaayusan ag kalinungan.
Sa nasambit nga checkpoint, maid-id nga gin-usisa ro mga saeakyan kun may nagakaigo nga rehistro, lisensya it driver, ag pagsunod sa mga sueundanan para sa kaeowasan kapareho it pagsuksok it helmet ag seatbelt.
Angot kara, pilang mga motorista ro nataw-an it tiket ukon Temporary Operator’s Permit ukon TOP it LTO bangud sa nagkaeain-eain nga pageabag.
Nagpadumdum man ro mga awtoridad angot sa tamang gawi sa pagmaneho ag pagpabilin it mga slow moving vehicle ukon mahinay nga saeakyan sa tuo nga parte it karsada.
