KALIBO, Aklan —Nagpamalibad anay nga magkomento ro pilang stakeholders sa isla it Boracay sa bansag ni Pangueong Rodrigo Duterte nga pieilakan sanda it basura ag higku it tawo.
Sa baylu gina tugyan nanda sa LGU Malay nga imaw ro may hurisdiksyon sa isla ro pagsabat sa nasambitang isyu.
Suno sa sangka negosyanteng miyembro it Boracay Foundation Incorporated (BFI), haum sandang magbulig sa gintao nga an-um nga bueang ultimatum it Pangulo agud masolusyonan ro gina pangatubang nga problema sa isla.
Sa pihak kara, dismayado sigon sanda sa bansag nga sangka cesspool ukon pieilakan it basura ro isla nga posible sigon nga makasamad sa industriya it turismo.
Posibli sigon nga saeang impormasyon ro gin paabot sa Pangueo hanungod sa nature ag lala it problema sa Boracay.
Maabo sigon ro maduea-an it trabaho engkasong minatud-on ni Duterte ro paeag nga igapasara ro isla bangud sa mga pag eabag sa environmental laws it mga hotels ag resort owners.
Sa pihak kara, nagapati sanda nga ro paandam it Pangueo hay sangka wake-up call agud maghueag roLGU-Malay ag iba pang natungdan nga ahensiya it gobyerno.
Gin suhestiyon pa kara nga buhusan it pondo it national government ro isla agud makahimo it naga kaigong aksyon sa problema eabi eon sa basura ag pagkay-ad it drainage system.
