KALIBO, Aklan — Bukon it pabor ag inde magpasakop ro ibang overseas Filipino workers (OFW’s) sa panawagan nga zero remittance umpisa makaron nga adlaw, Marso 28 hasta it Abril 4.
Paathag ni Bombo International Correspondent Jackie Torate it Hong Kong, uwa it magiging impact sa ekonomiya it Pilipinas ro pang-engganyo nga maeapnagong zero remittance bangud sa maabo gihapon ro inde magsunod kara.
Mas matimbang gihapon suno kana ro kinahang-ean it pamilya kaysa mag-intra pa sa away-pulitika.
Bilang Pilipino suno kay Torate, kinahang-ean nga suportahan kon sin-o man ro nakapungko sa presenteng administrasyon para sa ikaumwad it nasyon.
Ginpahayag dugang ni Torate nga inde dapat pag-isakripisyo ro ginasaligan nga kwarta it pamilya sa Pilipinas sa sangka tawo eamang bilang pagpakita it suporta.
Maabong pamaagi nga makapakita it simpatiya sa kaparehas kara nga sitwasyon apang dapat inde maapektuhan ro pamilya.
Gin-insister kara nga nag-abroad sanda agud nga kumita it mabahoe para sa pamilya.
Apang sa pihak kara, may una gihapon sigon nga naga-insister nga inde magpadaea bilang suporta kay dating Pangueong Rodrigo Duterte kapin eon sa anang kaadlawan makaron nga adlaw, Marso 28.
