Nagabatyag eon it stress ag depression ro pilang overseas Filipino workers ukon OFW’s sa Macau, China matapos nga nagtaas it uman ro kaso it covid-19 sa nasambit nga lugar.
Suno kay Bombo International Correspondent Emily Delos Santos, maabong mga OFW’s ro nawad-an it trabaho bangud nga nagsarado ro andang mga kumpanya kasunod it ginapatuman nga partially lockdown it Macau government.
Ro bukas eamang sigon makaron hay ro mga kaean-an ag grocery agud nga masiguro nga uwa it magutuman nga mga residente.
Apang, malisod para sa ibang mga OFW’s partikular ro mga bukon it domestic helpers ag stay out workers bangud nga uwa sanda it pambayad sa boarding house ag uwa eon it pambakae it pagkaon.
Masyadong strikto makaron ro protocol it gobyerno bangud nga kon sin-o man ro madakpan nga uwa nagasuksok it facemask nga N95 hay posibleng makulong it kapin sa daywang dag-on.
Samtang, mag-eowas sa ginakabaeak-an nga pagkalhit it covid-19 hay problema man sa nasambit nga rehiyon ro mainit nga panyempo rason nga ro iba kanda kara hay nagatinir eon lang sa sueod it baeay ag ginalimitahan ro mga outdoor activities.
Bukon eamang suno kana it ro virus ro andang dapat nga panaguan ag likawan kundi pati eon ro mainit nga panyempo sa guwa.
Nasayuran nga nagapanaeasa man makaron ro heatwave sa European countries.
