KALIBO, Aklan–Padayon ro Provincial Employment and Services Office ukon PESO-Aklan sa pagpatigayon it Overseas Special Recruitment Activity para sa mga pomoeuyo nga naila magtrabaho sa ibang nasyon.
Tuyo kara nga makatao it trabaho sa mga pomoeuyong Akeanon nga gusto makatrabaho abroad.
Ginpahayag ni Marsh Bernabe, PESO-Aklan Manager nga kada dominggo, kapin sa daywa nga overseas company ro nagadangop sa andang opisina para magpatigayon it nasambit nga recruitment.
Suno pa kay Bernabe nga maga-umpisa ro recruitment sa paea-abuton nga adlaw it Miyerkules, Mayo 4 hasta sa adlaw it Biyernes Mayo 6.
Nagkaeain-eain nga trabaho sigon ro nagahueat para sa mga naila magtrabaho abroad partikular sa mga nurse ag hotel staff.
Samtang, kinahang-ean man it kapin sa daywang dag-on nga work experience ag physically fit to work ro interisado nga aplikante.
Sa pihak nga parte,makit-an man sa FB page ukon magdangop sa opisina it Aklan-PESO para sa mga nagakaigo nga kinahangeanong dokumento sa pag-apply.
