KALIBO, Aklan—Sa kabilugan nga 35 nga pamilya nga gin-evacuate sa banwa it malay ag isla it Boracay, tatlong pamilya eon lang ro nagapabilin sa mga evacuation centers bangud sa bagyong Jolina.
Raya ro ginkumpirma ni Catherine Fulgencio it Municipal Disaster Risk Reduction and Management Office ukon MDRRMO Malay.
Suno kana nga ko martes hay nagpatigayon sanda it pre-emptive evacuation hasta nga ko ulihi hay ginpatuman eon ro forced evacuation sa mga residenteng naga-istar sa mga low-lying areas bangud sa sigidas nga pagbubu it uean ag pagbaha sa andang lugar.
Kabilugan nga 114 nga ka indibidwal ukon 35 nga pamilya ro nagbakwit suno kana sa siyam nga gintaeana nga mga evacuation centers.
Sa makaron hay sangka pamilya eon lang ro nabilin sa evacuation center sa cubay sur ag daywa sa sambiray ukon may kabilugan nga 12 tanan nga mga indibidwal.
Owa man suno kana it problema partikular sa pagkaon it mga evacuees bangud nga naka-standby ro MSWDO sa andang mga kinahangeanon.
Ginpahayag dugang nga may pila sa mga nailistang pagbaha , apang madali ma nga naghubas eabi eon sa area it diniwid, barangay yapak, nabaoy, pilang parte it barangay caticlan ag iba pa.
May nailista man nga mga maisot nga landslide apang insigidang nalimpyuhan ro area it naka standby nga municipal engineering office.
Samtang, may nasamad man suno kana nga highway sa barangay dumlog sa banwa it Malay.
Ginbutangan eon sigon nanda raya it nagakaigo nga warning device agud nga makalikaw sa aksidente ro mga naga agi nga motorista.
Sigidas man suno kana ro biyahe it mga motorbanca patabok sa boracay pinaagi sa Tabon-Tambisaan port, apang temporaryong ginapapundo kon mabaskog ro bubu it uean ag hangin.
