KALIBO, Aklan–Temporaryo nga ginsaylo sa ikaywang panaegan it barangay hall it Poblacion, Kalibo ro lugar kung siin pwedeng magproseso ro mga job order employee nga naga-apply ag renew it kontrata sa mga opisina it lokal nga gobyerno it Kalibo.
Suno kay Punong barangay Niel Candelario it Poblacion, Kalibo nga ginkasugtanan it bilog nga konseho ro temporaryo nga pagpaggamit it pilang porsyon it andang barangay hall.
Raya hay matapos ro naging hinyu it mga tawuhan ni Kalibo Mayor elect Juris Bautista Sucro sa pagpanguna ni Kagawad Mark Sy.
Ginpasiguro ni Kapitan Candelario nga indi maapektuhan ro operasyon ag pagtao it serbisyo it andang barangay.
Ginpaathag man kara nga ro mismong staff it Panalo Center ro naga-asikaso sa mga papeles ag aplikasyon.
Nasayuran nga ginaeauman eon ro uman nga paghire it mga bag-ong empleyado it munisipyo kadungan it pagbaylo it administrasyon.
