KALIBO, Aklan—Ginpaidaeom sa Granular Enhanced Community Quarantine (GECQ) ro Purok 12 it Oyo Torong Street nga sakop it Brgy. Poblacion ag Brgy. Bakhaw Sur, Kalibo epektibo alas-12:01 kainang aga-aga it Hulyo 21 hasta Hulyo 29, 2021.
Raya hay kasunod it ginpaguwa nga Executive Order No. 051 series of 2021 it lokal nga gobyerno it Kalibo kun siin kinahang-ean nga ipatuman ro striktong home quarantine ag pagbawae sa pagguwa it mga pumueoyo.
Suno kay Mayor Emerson Lachica nga tuyo kara nga mapunggan ro mas pang pagkalhit it COVID-19 infection sa nasambit nga Purok.
Ginpasiguro man kara nga makabaton it ayuda ro mga apektadong residente halin sa barangay ag lokal nga gobyerno it Kalibo.
Ginpahabaan man ro curfew sa nasambit nga Purok umpisa alas-7 it gabi-i hasta it alas-5 it aga-aga kamana man nga nagapadayun ro pagpa-iral it liquor ban.
Ro ginapasugtan eamang nga makasueod ag makaguwa sa critical zone hay ro mga essential workers.
Mag-eowas kara, temporaryo man nga igasardo ro mga non-essential establishment nga sakop it lockdown sa sueod it waeong adlaw.
Ginpadumduman man ni Mayor Lachica ro mga apektadong residente nga makipag-kooperar sa ginapatuman nga polisiya ag padayun nga magsunod sa minimum health protocols para malikawan ro pagkalhit it deadly virus.
