KALIBO, Aklan–Magapatigayun it People’s State of the Nation Address ro nagkaeain-eain nga grupo sa probinsya it Aklan agud nga ipaathag ro andang baeatyagon kadungan it ikaywang State of the Nation Address (SONA) ni Pangueong Ferdinand Marcos Jr. makaron nga adlaw, Hulyo 24.
Ginpahayag ni Kim Sin Tugna, Provincial Coordinator it Bayan-Aklan nga nagbuylog sanda kaibahan ro grupo it mga mangunguma, PAMALAKAYA ag Anak-bayan para sa nasambit nga aktibidad.
Gusto sigon nanda nga sukton ro administrasyong Marcos sa anang mga ginpromisa partikular ro pagpanaba it presyo it bugas sa P20.
Owa sigon it nakita nga matarong nga programa kun siin mas pang nagtaas ro presyo it bugas ag iba pang baeak-on sa nasyon.
Mag-euwas kara, gusto man nanda nga ipaathag ro andang sentimiyento angot sa padayun nga importasyon it isda bangud nagapatay raya sa local industry.
Kamana man ro ginaduso nga uman nga pagbalik it mandatory ROTC, manaba nga pondo sa edukasyon, trabaho ag sweldo it mga ordinardyong empleyado.
