KALIBO, Aklan–Nag-umpisa eon nga magbisita ag magpang-limpyo ro pilang pumueoyo sa mga sementeryo sa banwa it Kalibo masobra sang dominggo antes ro selebrasyon it piyesta minatay.
Na-obserbahan ro amat-amat nga pag-aeabutan it mga tawo sa sementeryo para magpanghawan sa palibot it nitso ukon eubnganan it andang mahae sa kabuhi nga nagtaliwan eon.
May iba man nga nagapatigayun it pagpintura.
Samtang, ro mga pumueoyo nga may importanteng transaksyon sa Nobyembre 1 ag 2 hay nauna eon nga naghaead it bueak ag nagsindi it kandila para dumdumon ro andang pamilya nga nagtaliwan eon.
Ginpahayag ni Carla Suñer Doromal, Executive Assistant to the Mayor I nga nagpagguwa eon it Executive Order si Kalibo Mayor Juris Bautista-Sucro para sa nagahilapit nga Undas.
Nakabaehag sa EO ro hugut nga pagpatuman it health protocols partikular ro pagsuksok it face mask sa sueod it mga sementeryo ag memorial park it banwa.
Hugut man nga ginabawaean ro pagdaea it de botelyang ilimnon, armas, mga mataeom nga bagay ag pag-karaoke.
Pagabuksan sigon ro gate it mga sementeryo umpisa alas-6:00 it agahon ag magasarado it alas-9:00 it gabi-i halin Oktobre 31 hasta Nobymbre 3, 2022.
Gin-engganyo man kara ro mga pumueoyo nga mag-adto it mas tempreno para malikawan ro pagdueotdutan.
