Kalibo Aklan ——–Temporaryo nga ginpasaraduhan ro pilang taeatapan it munisipyo it Numancia para sa disinfection matapos nga sangka empleyado ro nagpositibo sa coronavirus disease 2019 (COVID-19).
Sa abiso nga ginpaguwa it LGU-Numancia, umpisa makaron nga adlaw it Huwebes, Hunyo 3, sarado ro Office of the Municipal Mayor; Office of the Municipal Engineer; Office of the Municipal Planning and Development Coordinator; Public Employment Service Office / BIR; Office of the Sangguniang Bayan; Office of the Municipal Treasurer ag Office of the Municipal Assessor.
Indi pa masayuran kon hin-uno magabalik ro andang normal nga operasyon .
Sa pihak kara, ro iba pang taeatapan hay padayun nga magaserbisyo sa publiko nga may transaksyon umpisa alas- 8:30 it agahon hasta alas-4:00 it hapon halin Lunes hasta Biyernes.
Ro nasambit nga tikang it LGU Numancia hay para sigon sa kamaeayran ag proteksyon it ikamayad nga eawas it mga opisyal, empleyado ag kliyente .
Padayun man ro andang panawagan sa mga residente nga seryosohon ro pagsunod sa health protocol.
Sa pinaka-ulihing datos nga ginpaguwa it Provincial Epidemiology and Surveillance Unit it Provincial Health Office (PHO-Aklan) nga may petsang Hunyo 2, 2021, 3 ro bag-ong kaso it COVID-19 nga nailista sa Numancia.
Sa kabilugan, 172 eon ro total COVID-19 cases sa nasambit nga banwa, kaibahan ro 16 active cases ag ap-at ro nailistang namatay.
