KALIBO, Aklan–Nagdihon it petisyon ro pilang ka mga transport cooperative sa pamunuan it Department of Energy (DOE) kasunod it ginpatigayun nga conference it Western Visayas Transport.
Suno kay Mr. Edgar Igcasenza, Presidente it Malinao-Lezo Transport Cooperative nga ginpaabot nanda ro andang sentimiyento sa tunga it uman nga pagpataas sa presyo it produktong petrolyo.
Pila sigon sa andang ginpaabot nga suhestiyon hay ro pagsuspendi sa extra tax ag 12% VAT.
Engkaso nga mapasugtan hay mabahoe sigon raya nga ginhawa sa sektor it transportasyon.
Nagkasugot man sigon sanda nga hueaton anay ro magiging sabat it DOE sa andang petisyon antes maghimo it masunod nga tikang partikular ro pagduso it fare increase.
Aminado si Igcasenza nga malisod para sa mga pumueoyo kung madayun ro andang pagpataas it pamasahe.
Ginabuebanta nga naga-abot sa P15 ro andang igapasaka nga pamasahe sa dugang nga sang kilometro it pagbiyahe.
Ro fuel subsidy sigon nga gintao it gobyerno hay bastante eamang sa sueod it sang dominggo rason nga masyado gihapon nga malisod kanda ro mataas nga presyo it gasolina ag krudo.
