KALIBO, Aklan—Ginkumpirma it pilang transport group sa Aklan nga nabaton eon it pila sa andang miyembro ro fuel subsidy bilang bulig sa padayun nga naexperiensiyahan nga oil price hike.
Suno kay Mr. Leandro Lenciano, Chairman it Banga-Kalibo Jeepney Transport Service Cooperative nga raya eon ro ikaywang beses nga nakabaton ro mga drivers/operators it fuel subsidy.
Mag-eowas suno kana sa 6,500 pesos nga ayuda nga gin-release makaron nga buean it marso hay nakabaton man sanda it fuel subsidy nga 7,200 pesos ko nagtaliwan nga mga binuean bilang bulig sa pagpanasaea it covid-19 pandemic kun sa siin sambilog ro transport group sa grabeng naapektuhan.
Gindugang pa ni Lenciano nga ro subsidy hay pwedeng mabo-oe pinaagi sa gin-isyu nga cash cards halin sa Landbank of the Philippines.
Pwede raya nga gamiton nga pagbakae it langis ag indi pwedeng i-convert sa cash.
Sa pihak nga parte, mabahoe man sigon nga isyu makaron ro pagtau it nasambit nga subsiya sa mga drivers bangud nga ro cash card hay ginabuytan it mga operator.
Gindugang pa ni Lenciano nga ko pagpanaeasa it pandemya hay may gintaeana man nga bulig pinansiyal sa mga drivers sa idaeum it service contracting , kun sa siin naga abot sa haeos 20,000 hasta 30,000 pesos ro nabaton it kada driver it pampasaherong saeakyan depende sa kahugod it andang pagbiyahe may sakay sanda nga pasahero ukon owa.
