KALIBO, Aklan — Dismayado ro Tribu Tampogaling matapos nga owa nakatambong sa ginpatigayon nga awarding ceremony it bag-o eamang natapos nga Kalibo Sr. Sto. Nino Ati-Atihan festival 2025 ko gabi-i it domingo sa Magsaysay park.
Suno kay Rolando Soberano nga owa it nagakaigo nga abiso nga ginpaabot kanda rason nga napas-eawan sanda nga makasaka sa stage ag mabo-oe ro andang trophy ag cash prize.
Nasayuran nga ro Tribu Tampogaling hay gindeklara nga 1st place sa Tribal Small Category.
Naga-procession pa suno kana ro andang tribu kat gintawag ro andang pagdaog.
May naka-inform sigon sa ibang tribu rason nga owa eon ginpatapos ro procession ag insigidang nag-agto sa Magsaysay Park agud nga nakahingabot sa awarding ceremony .
Nagaeaum imaw nga maitama ro nasambit nga kapaltahan sa masunod nga dag-on bangud nga kanugon man suno kana ro andang preparasyon .
Sa pihak nga parte, ginpaabot man it grupo ro andang kaeain it buot sa social media sa natabu nga owa pagka-ilintindihan matapos nga owa ginpasueod ro andang mga miyembro sa Magsaysay park ko udtro adlaw it domingo bangud sa gina-alegar nga gina-reserve ro lugar para sa event pagka-gabi-i kun sa siin may mga artista nga maga-perform.
Suno kana nga nakasanayan eon it andang grupo nga kada dag-on hay gina-obra nanda nga meeting place ro Magsaysay park agud nga idtu magpahuway ag mag-ilabas.
Bangud sa natabu hay nagtaeang ro kaabuan sa andang miyembro ag owa eon nakakaon.
Sa mayad nga swerte suno kana ag ginpasugtan sanda it principal it Kalibo Pilot Elementary School nga gamiton ro lugar.
