KALIBO, Aklan—Naga-apela makaron ro pilang tricycle driver nga makaangkon it fare adjustment kasunod it ginpatuman nga bigtime oil price hike makaron nga adlaw it Martes.
Suno sa sangka tricycle driver it Brgy. Linabuan Norte, Kalibo nga dismayado sanda sa masyadong mataas nga presyo it gasolina apang owa sanda it mahimo kundi padayun nga magbakae.
Sambilog pa sa nagapa-antus sa kapareho nana nga driver hay ro sangkiri nga numero it pasahero apisar nga ginpasugtan eon ro 100 percent seating capacity sa pampublikong saeakyan ag mas pang ginhaeugaan ro restrictions.
Ginapanan-aw man kara nga posible eamang sanda nga makabawi engkaso nga ibalik eon ro in-person classes sa tanan nga lebel.
Sa makaron hay nagapabilin sa ap-at nga pasahero ro andang ginakarga halin sa paradahan.
May kaangtanan kara, nagpanawagan man ro sangka tricycle driver it Brgy. New Buswang, Kalibo sa gobyerno nga maghimo it aksyon para mapanaba ro presyo it produktong petrolyo.
Suno kana, nagapabilin gihapon nga maeanghay ro andang pagbiyahe kung siin apektado man ro andang kita.
Haeos owa eon man sigon sanda it mai-uli para sa andang pamilya bangud kaeabanan kanda hay naga-boundary eamang.
