NATIONAL News — Bukon pa it haum ro Pilipinas para sa magnitude 7.7 nga linog nga kapareho it tumama sa Myanmar ag Thailand ko nagtaliwan nga domingo suno sa Office of Civil Defense.
Suno kay OCD Administratör Undersecretary Ariel Nepomuceno nga may una nga daywang lebel it kahauman sa oras nga tumama ro sangka mabaskog nga linog.
Maabu eon sigon nga mga Pinoy ro nakasayod sa “duck, cover and hold” kada may linog bangud sa mga earthquake drill.
Unang lebel it kahauman para sa mabaskog nga linog hay ro engineering solutions sa pag-obra it mga baeay, building ag tulay nga earthquake proof.
Kinahangean man sigon nga ma-retrofit ro mga eskwelahan ag health center para maka-eowas sa mabaskog nga linog.
Haum man sigon nga magsabat ro gobyerno sa mabaskog nga linog sa pag-angkon it mga ‘trained team’ it mga rescuer.
Kan-o eamang hay ginpahayag it Phivolcs nga euto eon ro Marikina West Valley fault, sambilog sa aktibong fault sa nasyon, eabi pa ag owa eon raya naghueag matapos ro nakataliwan nga 200 anyos.
Samtang, ginpahayag ni Nepomuceno nga posibleng magtuga it magnitude 8.3 nga linog ro Manila Trench Fault ag posible man ro tsunami.
Bangud kara hay gin-engganyo it OCD ro mga Filipino nga bisitahon ro hazardhunter.ph ag ibutang ro address agud nga makita kon ro andang baeay hay maeapit sa fault system ukon landslide-prone area.
