KALIBO, Aklan—Gin-insister ni Aklan 1st District Sangguniang Panlalawigan member Atty. Harry Sucgang nga dapat nga padayunon it Pilipinas ro pakikipagsukoe agud nga mabawi ro kinamatarung kara sa West Philippine Sea kontra sa nasyong China.
Suno kana nga ginabuytan makaron it nasyon ro ginhimo nga desisyon it International Arbitrary nga nagapabor sa apela it Pilipinas bagay nga padayun nga ginabalewala it China.
Bangud sa pag-okupa it China sa WPS hay mabahoe suno kana ro posibilidad nga maging puppet eon nanda ro nasyon ag indi eon makapalag bangud sa mga istraktura nga gintukod ag pag-deploy it mga missiles ag iba pang armas nga pang giyera.
Napabay-an sigon it Pilipinas ro nasambit nga teritoryo kasunod it pagpahalin it US bases sa nasyon kun sa siin hay owa eon nakapatigayon it pagpatrolya sa lugar.
Sa pihak kara, nagapati si Atty. Sucgang nga magapabilin ro suporta ag bulig it amerika sa pilipinas engkaso nga makaangkon it mga pag-atake.
Kinahangean sigon makaron ro bulig it international community eabi eon it Russia para sa diplomatikong pag-resolba sa isyu.
Dugang pa kara nga dapat man nga seryosohon it gobyerno ro mga gina-obra nga pagpang-bully it China sa mga mangingisdang Pinoy ag maskin sa Philippine Coast Guard.
Indi man sigon dapat nga ikabit ro isyu sa West Philippine Sea sa ibang isyu kapareho it donasyon it COVID 19 vaccines ag pilang mga proyektong naibulig it China sa Pilipinas.
