KALIBO, Aklan — Ginakabaeak-an makaron it Department of Health ro uman nga pagtuhaw it polio virus sa nasyon.
Raya hay matapos nga nagpositibo sa nasambit nga sakit ro sangka tatlong dag-ong onga babaye sa Lanao del Sur.
Suno kay Provincial Health Officer II Dr. Cornelio Cuatchon, maskin nga gindeklara it World Health Organization (WHO) ko dag-on 2000 nga polio-free ro Pilipinas, high risk gihapon ro nasyon sa nasambit nga sakit.
Raya hay matapos nga nagnaba ro coverage it polio vaccination.
Ginpaathag nga dapat naabot it ahensya ro 95 porsyento nga vaccination sa mga onga agud mahambae nga protektado ro mga raya sa ginakabig nga makataeapon nga sakit.
Suno pa kana, mahina ro polio surveillance ag may naga-practice gihapon it open defecation ukon nagahigku maskin siin eamang nga lugar.
Pila sa mga sintomas it sakit hay may eagnat ro onga nga daywa hasta limang adlaw; masakit ro tiyan ag ueo; ag pwedeng mag-develop sa serious complication nga maga-apekto sa utok ag spinal cord nga magaresulta sa permanenteng pagkaparalisa ukon ikamatay it pasyente.
Agud nga malikawan ro nasambit nga makataeapon nga sakit, kinahang-ean ro eksaktong paghugas it alima; zero open defecation ag ro proper hygiene.
Siguraduhon man suno kana nga makabaton it tatlong dosage it polio vaccine ro mga eapsag bilang pangontra sa sakit.
Nauna eon nga ginkumpirma it DOH ro panibag-ong kaso it polio sa Pilipinas matapos ro 19 anyos nga pagiging hilway it nasyon halin sa nasambit nga sakit.
Mag-eowas kara, may ginadudahang kaso man sigon it acute flaccid paralysis nga ginabantayan ro ahensya.
